सोशल मीडियाचा जमाना आल्यामुळे जगातल्या कुठल्याही कोपऱ्यात बसून कुठेही आपल्याला इंटरनेटमुळे जगाचा वेध घेता येतो. अनेक देशोदेशींच्या बातम्या एका क्लिकद्वारे आपल्याला कळू शकतात. आजच्या टेकसेव्ही जगात मीडिया या शब्दाला खूप महत्व आहे, मग तो मीडिया म्हणजे सोशल मीडिया असो, इलेक्ट्रॉनिक मीडिया असो... कधीही इतकी गरज आजच्या आमच्या तरुण पिढीला मीडियाची लागली नाही जेवढी ती आज लागली आहे. बरं आता तर फक्त तरुणाईचं फेसबुक वॉट्स ऍप आणि इन्स्टाग्राम वापरते असा नाही तर जे वयोवृद्ध आहेत, आपल्या आई वडिलांच्या वयाचे आहेत, किंवा काही काही तर आजी आजोबांच्या वयाचे आहेत, त्यांचेसुद्धा अकौंट्स फेसबुक आणि इंस्टाग्रामवर आहेत. या नवीन सोशल मिडियाच आकर्षण लहान ते वृद्ध अश्या सगळ्या वयोगटाला आहे. त्यामुळे जगाच्या कानाकोपऱ्यातल्या ज्या काही व्हायरल गोष्टी आहेत, त्या आपल्या मोबाईलवर किंवा कॉम्प्युटरवर इंटरनेटद्वारे कळू शकतात. हा जो काही व्हायरल होणं प्रकार आहे, त्याने तर कित्येक सामान्य माणसांनाही सेलिब्रिटी बनवून टाकलं आहे. म्हणून काय कुठे केंव्हा कशी कोणती गोष्ट व्हायरल होईल याचा भरोसा नाही.
अशीच एका व्यक्तीची व्हिडियो क्लिप अल झझीरा या वाहिनीवरून दाखवल्यानंतर व्हायरल झाली आहे. सदर व्यक्ती हि सायकल वरून मागे सॅक अडकवून पिझ्झा डिलिव्हरी करायला जात आहे असं या क्लिप मध्ये दिसतंय. या व्यक्तीने नारंगी रंगाचा शर्ट घातला आहे आणि एकूणच त्या व्यक्तीकडे बघून हा माणूस पिझ्झा डिलिव्हरी पर्सन आहे हे लक्षात येतं आहे. कोणालाही सुरवातीला अस वाटू शकतं कि हे सगळं सांगण्यात आणि दाखवण्यात काय विशेष आहे... असं बोलणं सहाजिक आहे. पण मित्रानो खालच्या दोन फोटोमध्ये दिसते आहे ती कोणीतरी सामान्य व्यक्ती नाही.
फोटोत जी व्यक्ती आहे, तिचं नाव आहे, सय्यद अहमद सादात... त्यांच्याकडे ऑक्सफर्ड विद्यापीठातून पदव्युत्तर शिक्षणाच्या कम्युनिकेशन आणि इलेक्ट्रॉनिक इंजिनिअरिंग मध्यल्या दोन डिग्र्या आहेत. सादत याना मागच्या 23 वर्षांपासून 20 कंपन्या आणि 13 देशांमध्ये काम केल्याचा जबरदस्त अनुभव आहे. त्यांच्या कामाचं क्षेत्र अर्थातच टेलेकम्युनिकेशन ... ही व्यक्ती उच्च शिक्षित आहे, आणि यांची दुसरी ओळख करून द्यायची म्हणजे ते 2 वर्ष अफगानिस्थान चे टेलेकम्युनिकेशन मिनिस्टर म्हणून काम पाहात होते. अश्रफ घनी राष्ट्रपती असताना 2018 ते 2020 या काळात सादत मंत्री होते. काही कारणांमुळे घनी यांच्याशी मतभेद झाल्यामुळे सादात यांनी राजीनामा दिला आणि एक नवीन आयुष्य सुरु करण्याच्या हेतूने ते जर्मनीत स्थायिक झाले. पण त्यांच्याकडे असलेल्या पदव्यांचा आणि त्यांच्या अनुभवाचा फायदा हा नोकरी मिळवताना झाला नाही, शेवटी त्यांचे पैसे संपल्यामुळे त्यांनी लिव्हरांदो या कंपनीत फूड डिलिव्हरी पर्सन म्हणून काम सुरु केलं. त्यांचे वास्तव्य लिपझिग या शहरात आहे.
कुठल्याही हाय प्रोफाइल व्यक्तीने अशा प्रकारचं काम करणं हे क्वचितच घडलं असेल. सादत याना याबद्दल कुठल्याही कमीपणाची भावना नाही, उलट ते म्हणतात की ते समाधानी आहेत, आणि त्यांची गोष्ट ही एकप्रकारे नवीन प्रेरणा देईल आणि कुठलंपण काम कमीपणाचं नाही हे अधोरेखित करेल. अफगाणिस्तानात मंत्रीपदावर असताना त्यांच्या आजूबाजूला बॉडीगार्ड असायचे पण आताच्या कामात ते त्यांच्या सायकलने पार्सल पोहोचवण्याचं काम करतात. सादत यांच्या म्हणण्यानुसार इतरही लोक त्यांचं अनुकरण करतील अशी अपेक्षा आहे.
युरोपमध्ये खासकरून शिक्षण आणि साक्षरतेमुळे सामान्य आयुष्य जगूनसुद्धा असामान्य गोष्टी करता येऊ शकतात अश्या व्यक्तीसुद्धा आहेत. बॉडीगार्ड असणं हि गोष्ट कमीपणाची आहे, असंच जणू काही सजग उच्चपदस्थ व्यक्तींना वाटत असावं. मागासलेल्या किंवा विकसनशील देशांमध्ये, राजकारण्यांना अवास्तव महत्व दिलं जातं आणि त्याच्या महागड्या गाड्या, आजूबाजूला बॉडीगार्डस, असं चित्र दिसतं. याउलट यूरोपसारख्या संपन्न खंडात उच्च विचारसरणी आणि सामान्य राहणी या तत्वाचा अवलंब करणारे कर्तृत्वाने मोठे लोक आहेत. सादत यांच्यासारख्या लोकांमुळे एक नवीन आदर्श निर्माण होऊन कित्येकांना आयुष्यात खचून न जाता परिस्तिथीचा सामना करून नवी उमेद मिळेल अशी अपेक्षा करूयात...
- निखिल कासखेडीकर
टिप्पण्या
टिप्पणी पोस्ट करा