जो माणूस अजूनही स्मार्ट फोन वापरत नाही, विकत घेतलेली जुनीच गाडी चालवतो, 1958 साली 31,500 डॉलरला घेतलेल्या जुन्याच घरात आजही राहतो आणि रोज ब्रेकफास्ट मॅक्डोनाल्ड्स मध्ये बर्गर आणि कोक पिऊन करतो, आणि ज्याचं रोजच्या ब्रेकफास्टचं बिल 3.17 डॉलरच्यावर नसत असा हा जगात राहूनही जगावेगळा असतो अश्या वॉरेन बफे यांचा आज वाढदिवस...
बफे यांचा जन्म 1930 चा... स्थळ ओमाहा, नेब्रास्का या राज्यातला. वडील हॉवर्ड हे गुंतवणूक दलाल म्हणून काम करत होते, तसच चार वेळा अमेरिकी काँग्रेसमध्ये रिपब्लिकन पक्षाचे खासदार होते. वॉरेन बफे याना दोन बहिणी. बफेनी वयाच्या 11 व्या वर्षी आयुष्यातली पहिली गुंतवणूक केली. सिटीज सर्व्हिस या तेल कंपनीचे 3 शेअर प्रत्येकी 38 डॉलरला विकत घेतले. आणि 40 डॉलरला ते शेअर विकले, त्यांना प्रति शेअर 2 डॉलरचा फायदा झाला. जेंव्हा या सिटी कंपनीचे शेअर प्रति शेअर 200 डॉलर इतके झाले तेंव्हा आयुष्यातला गुंतावणुकीतला पहिला धडा शिकले तो म्हणजे गुंतावणूकदाराकडे प्रचंड पेशन्स पाहिजे. वयाच्या 6 व्या वर्षी बफेनी च्युइंग गम विकलं, तसाच पुढे जाऊन घरोघरी कोका कोलाच्या बाटल्या विकल्या. वयाच्या 13 व्या वर्षी बफे यांचे कुटुंब वॉशिंग्टन डी सी ला राहायला गेलं.
वोरेन यांनी 13 वर्षाचे असताना पैसे मिळवण्यासाठी वोशिंग्टन पोस्ट हे वर्तमानपत्र घरोघरी जाऊन विकलं, त्यासाठी ते पहाटे 4.30 ला उठायचे. 15 वर्षाचे होईपर्यंत वोरेन यांनी वर्तमानपत्र विकून त्यातून 2000 डॉलर्स कमावले. 20 वर्षाचे होईपर्यंत त्यांनी 5000 डॉलर्स इतकी रक्कमेची बचत केली. आजच्या घडीला तेंव्हाचे 5000 डॉलर म्हणजे 53000 डॉलर्स होय.
1950 ला नेब्रास्का विद्यापीठातून पदवी मिळाल्यानंतर 1951 साली त्यांनी कोलंबिया विद्यापीठातून अर्थशास्त्रात मास्टर्स डिग्री मिळवली. पुढच्या कामासाठी म्हणून ते न्यूयॉर्क मधून परत त्यांच्या गावी म्हणजे ओमाहा ला आले, आणि त्यांनी व्यवसाय सुरु केला. 1956 ला बफेनी, बफे पार्टनरशीप हि स्वतःची गुंतवणूक कंपनी सुरु केली. 1962 ला पहिल्यांदा त्यांनी बर्कशायर हॅथवे या कंपनीत गुंतवणूक केली, हि न्यू इंग्लंड मधली टेक्स्टाईल मॅन्युफॅक्चरिंग कंपनी होती. 1965 ला त्यांनी बर्कशायर मध्ये त्यांच्या बफे पार्टनरशीप कंपनीकडून टेकोव्हर केली.
अशी बफे यांच्या आयुष्याच्या वेगवेगळ्या टप्प्यांवर घडलेल्या घटनांची यादी खूप मोठी आहे. बफे हे अत्यंत साधं राहणं पसंत करतात. त्यांच्या कंपनीतील काम करणाऱ्या लोकांची संख्या आहे फक्त 25... बफे सांगतात नजीकच्या फायद्यापेक्षा लांबच्या फायद्याकडे लक्ष देणं अधिक योग्य आणि चांगलं असतं. उगीचच शेअरमध्ये गुंतवणूक करायची म्हणून करू नये तर कंपनीची बॅलन्सशीट पाहून त्या कंपनीचा अभ्यास करूनच मग योग्य पाऊल उचलावे.
बफे यांची आजच्या काळातील संपत्ती आहे 10,390 कोटी अमेरिकी डॉलर... 2006 ला वॉरेन बफेनी ते स्वतःच्या संपत्तीपैकी 80 टक्के रक्कम हि चॅरिटी म्हणून देण्याचं घोषित केलं. बिल आणि मेलिंडा गेट्स फाउंडेशनला त्यांनी सगळ्यात ज्यास्त रक्कम दान म्हणून दिली आहे. त्यांच्यानुसार ते आरोग्य आणि शिक्षण क्षेत्रात तसंच खाजगी कंपन्यांमध्ये गुंतवणूक करणार असल्याचं म्हटलं आहे.
गुंतवणूक क्षेत्रातलं उत्तुंग व्यक्तिमत्व अशी बफे यांची ओळख आहे. 20 व्या शतकातील एक असामान्य गुंतवणूकदार असं सुद्धा त्यांना म्हटलं जातं. जगातल्या सहाव्या श्रीमंत व्यक्ती म्हणून बफेंकडे आज पाहिलं जातं... गुंतवणूक क्षेत्रात त्यांच्या विधानांकडे, तसंच ते काय सल्ला देतात तसंच त्यांचा पैसे गुंतवणूक करण्यासाठीचा रोख कोणाकडे आहे, हे लोक बारकाईने अभ्यासतात त्याचं विश्लेषण करतात... आज ते 91 वर्षाचे झाले आहेत, अश्या ओरॅकल ऑफ ओमाहा याना वाढदिवसाच्या खूप खूप शुभेच्छा...
- निखिल कासखेडीकर
टिप्पण्या
टिप्पणी पोस्ट करा