अशांत अफगाणिस्तान...!

हा फोटो आहे, अमेरिकेचे माजी राष्ट्राध्यक्ष धाकटे जॉर्ज बुश साहेबांचा...ठिकाण एमा बुकर प्राथमिक शाळा, सारसोटा, फ्लोरिडा. तारीख 11 सप्टेंबर 2001.

जॉर्ज बुश हे त्यांच्या शिक्षण क्षेत्रातल्या कामाविषयी त्यांच्या तत्कालीन शैक्षणिक धोरणाविषयी माहिती देण्यासाठी एमा बुकर या फ्लोरिडा राज्यातल्या सारासोटा इथल्या शाळेत भेट द्यायला गेले होते.

सकाळची वेळ होती, बुश शाळेत दाखल, झाले. सगळे व्यवहार व्यवस्थित चालू होते. क्षणार्धात परिस्थिती इतकी बदलेल आणि काही अघटित घडेल याची सुतराम शक्यता वाटली नाही. यासुमारास बुश याना वल्ड ट्रेड सेंटर च्या पहिल्या विमान हल्ल्याबद्दल ब्रिफ करण्यात आले. सुरवातीला एखादं छोटं विमान धडकलं असेल असं वाटून त्याकडे ज्यास्त लक्ष दिलं गेलं नाही. त्यानंतर, बुश दुसरीतल्या विद्यार्थ्यांना धडा वाचून दाखवत होते. तेवढ्यात अचानक व्हाईट हाऊस चीफ ऑफ स्टाफ अँड्र्यू कार्ड, बुश यांच्या जवळ आले, आणि कार्ड यांनी बुश यांच्या कानात हळूच सांगितले, ते शब्द होते, " दुसऱ विमान वल्ड ट्रेड सेंटरच्या दुसऱ्या इमारतीवर धडकलं आहे, अमेरिकेवर हल्ला झाला आहे" .

अगदी त्याच क्षणी टिपलेला हा फोटो आहे. बुश यांच्या चेहऱ्यावर ताण आणि चिंता या फोटोत दिसते आहे. बुश यांनी स्वतःला सांभाळत काहीही झालं नसल्याचं दाखवलं, पण त्यांच्या या चिंताक्रांत झालेल्या चेहऱ्याने तिथे उपस्थित असलेल्या विद्यार्थी, शाळेचा कर्मचारी वर्ग, प्रशासनातले अधिकारी वर्ग या सगळ्यांनाच लक्षात आलं की काहीतरी गंभीर गोष्ट घडली आहे.

या नंतर जे झालं ते सारं जगाला माहिती आहे. ज्या मूलतत्त्ववाद्यानी 9/11 चा हल्ला घडवून आणला, तेच लोक अगदी बरोबर 20 वर्षानंतर परत अफगाणिस्तान मध्ये सत्तेवर आले आहेत. अमेरिकेबद्दल काळजी वाटण्यासारखी परिस्थिती निर्माण झाली आहे. 1996 ते 2001 या काळात तालिबान अफगाणिस्तानात सत्तेवर होती. मग वॉर ऑन टेरर चालू झालं. तालिबान सत्तेवरून पदच्युत झाली. अमेरिकेने 20 वर्ष त्यांच्या पाश्चिमात्य मित्र देशांबरोबर नाटो बरोबर अफगाणिस्तान शांत करण्याचा प्रयत्न केला. त्यात ते यशस्वी झाले. पण अमेरिकेने तडकाफडकी अफगाणिस्तानातल्या लष्करी कमांडर्सना न कळवताच काही दिवसांपूर्वीच अचानक आपले ट्रूप्स मायदेशी पाठवले, आणि 20 वर्ष केलेल्या सत्तेवर, शांतता पसरवण्याचा आणि लोकांचं जीवनमान सुधारण्याच्या प्रयत्नांवर पाणी फिरलं.

या सगळ्यात सरशी झाली ती तालिबानची. याच तालिबानशी पूर्वी दोन हात केले आणि आता अमेरिकेवर अशी पाळी आली की त्यांच्याशी चर्चा करण अमेरिकेला बरोबर वाटलं.

येणाऱ्या काळात अमेरिकेच्या परराष्ट्र धोरणाचा कस लागणार आहे, तो पर्यंत सगळी परिस्थिती निवळेल अशी आशा करून काही सकारात्मक घडेल आणि लोकशाही टिकेल, आपण एवढंच सध्यातरी बघुयात.

-निखिल कासखेडीकर.